24‏/3‏/2016

ظالمون انفسهم

الانسان طبيعى انه يعيش فى مجتمع سوى وممكن يكون فيه انحرفات طفيفه لأن الطبيعى مش كل الناس داخله الجنة . والطبيعى ان سلوكنا كبشر يكون مميز عن الحيوانات وممكن يكون فيه انسان يكون ادنى سلوكا من الحيوان وده طبيعى لأن مش كل الناس محترمة . والطبيعى ان الانسان يكون صادق وممكن يكذب لو هيموت .
 الى مش طبيعى اننا نلاقى السلوك البشرى بقى حيوانى ودموى وهابط وسفيف . اننا لما نتعامل مع الناس نلاقى كله بيكدب وعارفين انهم بيكدبوا والى بيكلمهم كداب وهما عارفين ومع ذلك يكونوا مضطرين يتعاملوا مع بعض . ومع كمية اللامبالاه والكدب ده سلوك الانسان يتغير مش بمزاجه انما غصب عنه لانه مضطر يتعامل مع الفئة دى وتبدأ شخصيته تتلاشى ومش يقدر يمنع ده كأنه نقطة حبر فى ميه .
وممكن جدا يكون السبب الى وقعه فى البيئة دى هو نفسه مش مقتنع بيه ولكنه بيحاول يقنع نفسه ان ده الصح وخصوصا مع محاولات لإيجاد ذاته التى ما زالت ضائعه والتى مرت من بين اصابعه كالهواء . فيعلم اخيرا الحقيقة التى يرفضها انه يعيش فى مجتمع وانه ظلم نفسه لأنه اراد ان يغير قواعد اللعبة التى يلعب بها الجميع فتأخر دوره فى اللعب وهنا ظلم نفسه مره اخرى !

هناك 10 تعليقات :

  1. صباح الخير يا جمال
    انا كنت جايه أعلق على البوست اللي فات لاقيت كلامك ده اللي هو عباره واقع نعيش فيه سواء احنا رافضين أو عاوزين هو ده الواقع بتاعنا...
    كمية الكدب بقيت غير عاديه وكمية سخافه وانحطاط أخلاقي غير عاديه على رأي أحد الأصدقاء احنا عايشين فيما وراء البكابورت اسفه على المصطلح...
    وماحدش عاوز يغير من نفسه...
    وتقابل اللي يقولك الدنيا بقيت وحشه اوي والناس اتغيرت
    ويا عم وانت فين ما تبدأ بنفسك واتغير
    يجي لك الرد بسرعه اتغير ازاي كل الناس كده
    وانت مالك ومال الناس ابدا بنفسك
    وندخل في جدال ليس منه أدنى فائده
    عارف يا جمال إذا كل واحد فينا بدأ بنفسه هنتغير فعلا وللعلم لسه في ناس رائعه وقلوبها طيبه ومليانه خير بس الغالبيه واللي واضح الناس اللي تفكيرها شمال
    كل واحد يعمل اللي يمليه عليه ضميره و يعامل ربنا وحتى لو وقعنا في مصيدة بشر فاسدين احنا نخلي أنفسنا غيرهم
    معلش لو رغيت أو خرجت عن الموضوع الأصلي...

    ردحذف
    الردود
    1. أختى زهراء منورة الدنيا
      أنا بعتبر كلامك إضافه للبوست وفى صميم مقصدى وسعيد جدا بيه وكلام أحد الأصدقاء للأسف صحيح مليون الميه
      ومهما كنا كويسين أو بنحاول نكون كده لازم نرجع لنفس اللعبه تانى الى إحنا مخترنهاش

      حذف
  2. إذن لنقاوم من اجل أنفسنا.. كي لا نخسرها
    شكراً جزيلاً لجميل ما خطه قلمك

    ردحذف
    الردود
    1. أختى طيف
      لكل شئ نهايه والمقاومة نادرا ان تاتى بنتيجه ورغم ذلك نقاوم لاننا غن لم نفعل ذلك سنخسر احترامنا لأنفسنا وبالتالى نخسر كل شئ

      حذف
  3. انت جيت عالجرح
    الجرح اللى اغلبنا عايشين فيه
    للاسف يا جمال مش عارفه اعلق اقول ايه
    !!!!!!!
    لكن حسيت قد ايه انت من جواك حاسس بالخيبه والتمرد والاحباط وربما اليأس
    انا من رايى اننا نعامل الناس بمعاملتنا احنا
    باللى اتربينا عليه
    بثقافتنا واخلاقنا
    حتى لو كانوا ميستاهلوش حتى لو كانوا حيوانات فى سلوكوهم وافعالهم
    يكفى اننا مش نسمحلهم يغيرونا ونكون زيهم
    او نسخه تانيه منهم

    ردحذف
    الردود
    1. أختى قمر وليل
      الجرح لا يلتئم طالما إحنا بقينا نفتخر بالأخلاق السيئة والمعامله الغير الحسنه وبنعتبر النصب شطاره والسرقه حرفة
      انا بقى من جوايا بتجاهل معظم الحاجات دى بس للأسف بقى منتشره فى الشوارع والمقاهى والمدارس حتى السب الى كان ممكن حد يقوله سرا لانه عيب بقى جهرى فى الشارع ولو شخص راكب سياره مليون الميه هيشتم شخ أو اتنين على الاقل فى طريقه .فهل ممكن نسيطر على ده

      حذف
  4. كل شيء بقى مش طبيعي
    والأكثر وعيا وإدراكا لهذا الواقع هو الأكثر انحرافا عن الطبيعي في هذا الزمن .. للأسف :(

    ردحذف
    الردود
    1. أختى الفاطمة
      الإنحراف أصبح صفة عامه للبشر .أشعر احيانا أن طبيعة البشر تغيرت مثل طبيعة الارض والمناخ

      حذف
  5. * يا ربنا على آخر 4 سطور دول!!
    أقول إيه بس يا جمال يا أخويا؟؟
    إييييييه
    الحمد لله على كل شيء
    المهم أنت إزيك؟؟ وعامل إيه؟؟ يا رب تكون بخير وصحة وسعادة إن شاء الله .. عاوزين نتقابل يا عم .. من فترة كده اتشرفت بمقابلة الباشمهندس الخلوق الجميل/ محمد سلامة وجبنا سيرتك بكل خير والله .. بس ساعتها للأسف ما كانش معايا الخط اللي عليه نمرتك .. فاحتياطي هاكتب لك نمرتي في تعليق تاني ويا ريت تبعت لي نمرتك على الهانج أوت في الجوجل بلس :)
    سلام يا غالي

    ردحذف
    الردود
    1. شريف باشا
      واحشنى كتير يا غالى
      إنت الى عامل ايه فى الحياة واخبارك ايه وأخيار المدونة ايه :)
      م/ محمد سلامة كلمنى وبلغنى وحضرتك وهو من الشخصيات المحترمة والى بعتز بيها فى العالم الإفتراضى واتمنى يكون فيه لقاء عن قريب ان شاء الله
      النمره تم ارسالها اما رقمك فما زال على الهاتف :)
      مع السلامة اخى الغالى
      نورت مكانك

      حذف