17‏/7‏/2015

أهلا بالعيد (عيد الفطر المبارك)

أحبائى فى عالم التدوين كل سنة وحضرتكم بخير وسعادة . 
ونتمنى من الله ان يتقبل صيامنا وقيامنا وسائر الأعمال
بمناسبة العيد عايز أرغى معاكم شوية :)

أكيد كل واحد له طريقه فى الإستمتاع بالعيد يعنى فيه الى بيحب يقضيه راحة وفيه الى بيحب يتفسح 
ويخرج وفيه الى بيحب يقضيه إنتقام وكبس .. بس كل واحد عنده جزء من يومه له مكانه خاصة فى قلبه 
أنا مش بحس إن كان فيه رمضان إلا بصلاة العيد 
وحبى لتكبيرات العيد قد يرقى لمرتبة الطرب
وطبعا ده بسبب إن التكبيرات مرتبطة بذكريات طفولة 
يعنى ديما الحاجه الى بنعملها وإحنا أطفال بيبقى ليها مكانه فى قلوبنا وإحنا كبار .
وانا صغير كنت لازم أتمم على ولدى يصحينى ساعة صلاة العيد  وكان لازم نفتح الراديو نسمع منه التكبيرات طبعا الراديو ده بقى فى تعداد الأموات دلوقتى :) 
لكن التكبيرات وصلاة العيدالحمد لله لسه ليها مكانتها فى قلبى
وطبعا مش هنسى العيدية الى كنت صاحب الرقم القياسى فيها لمعظم الأعوام بالنسبة لزميلى وصحابى والى انقرضت لكن والدى لسه مصمم أخد منه عيدية لحد دلوقتى وبصراحة بيكون ليها إحساس تانى يعنى الواحد بيحس إنه رجع طفل تانى
وكل ده كان بيكتمل بلمة العيلة كلها . لكن طبعا التليفون قضى على اللمة دى . لكن ما زال فيه الروح الطيبه والحب
معلش بقى طولت عليكم 
كل سنة وأنتم طيبين 
وربنا يجعله عيد سعيد على الناس كلها 
وعلى العالم كله

تحياتى
النسر المهاجر

هناك 8 تعليقات :

  1. كل لحظه وانت بخير يا جمال ويارب كل ايامك اعياد وخير
    الراديو لم ينقرض ولسه حريصه انى اسمعه يوميا تقريبا لكن بصراحه فى رمضان لا اخفيك سرا انى لا اتابع اى شئ سواء فى التى فى او الراديو
    يارب عن قريب تدى بقى انت العيديه لولادك وربنا يبارك لك فى الوالد ويارب على الدوام متجمعين بصحه وسعاده

    ردحذف
    الردود
    1. زهراء
      كل سنة وإنتى بخير وسعادة وربنا يسعدك ويبارك فيكى
      يا زهراء الراديو الى عندنا والى كنت بسمعه كان راديو خشب من بتاع زمااااااااااااااااااان
      وطبيعى أنا محظوظ إنى شوفته إنما الرداوى الجديدة فدى موجوده عادى
      ربنا يخليكى يا رب ويبارك لك فى كل حبايبك أما لو فيه نصيب أشوف ولادى فاكيد انا الى هاخد منهم عيدية :) ههه
      منورة مكانك ديما أختى الغالية

      حذف
  2. عيدكم مبارك وأيامكم سعيدة وكل عام وأنتم بخير.. إن شاء الله تحقيق الأماني
    حلوة أجواء العيد.. نفس العبارة نرددها كل عيد لكنها لم تفقد نكهتها
    بعدني أحب العيدية.. بس ما أعرف اسوي مقلب رأساً يبين على وجهي:)

    ردحذف
    الردود
    1. كل سنة وإنتى طيبه طيف ويا رب يكون العيد عدى عليكى بسعادة وربنا يجعل كل ايامك فرح وسرور
      أجواء العيد مميزه مادام هناك تألف وحب بين الأسرة
      اما العيدية العيد ميحلاش الا بيها
      شكرا لمرورك الى أسعدنى وشرفنى كثيرا
      ومتشكر جدا لمتابعتك الدائمة اختى الكريمة
      تحياتى

      حذف
  3. كل عام ونحن جميعا بالخير والسعاده .. ويارب تعود الايام بالصحه عليك وعلى حبايبك
    كل الود ياجمال

    ردحذف
    الردود
    1. شاعرتنا الجميلة ابتسام حسين
      كل سنة وإنتى بخير وسعاة
      وربنا يجعلها سنة سعيدة وتأتيكى بالخير كله
      نورتى النسر المهاجر
      وشرفتينى بوجودك

      حذف
  4. السلام عليكم
    ازيك عامل ايه يارب تكون فى احسن حال
    وكل سنه وانت طيب
    والله اسعدنى سؤالك عنى شكرا ليك
    هى بس حاله خمول تدوينى وانا والله مش بحب ابعد عن التدوين.كتير لانى بحس ان ناقصنى شىء كبير اوى اوى
    انا بدور فى التعليقات عندك على تعليقى عالبوست ده مش لاقياه يظهر انه موصلش
    كنت علقت عليه من فتره
    تحياتى ليك وياريت تكتب بوست
    فى.انتظارك

    ردحذف
    الردود
    1. كل سنة وانتى بسعادة دائمة يا قمر
      تقريبا الخمول ده حالة عامة وبحاول اعدى منها
      يمكن تعليقك مش موجود بس إنتى الغائبة الحاضرة لأنك من أهم متابعين النسر المهاجر
      مودتى واحترامى اختى العزيزة
      بالنسبة للبوست فحاول بس تكتبى قصيدة :)

      حذف