فكرة

بما إنى كنت فى رحلة عقلية وإديت لمخى اجازة علشان يفضى من اى حاجه وهو مش راضى . خطر فى بالى فكره بصراحة مش هقدر أعملها لواحدى إنما محتاجه مدونين كتير معايا ودى مش مرتبطه بالمدونين الى بيشرفونى بالزيارة بس إنما مدونين كتير . 

ولكن للاسف عارف إن ممكن أصاب بخيبة أمل لأن المدونين وبصراحة نفسهم قصير فى الكتابة وجزء منهم هجر مدونته للفيس 

ولما إتعمل مخطوطه علشان تجمع كتابتهم الجميلة محدش حاول يشارك إما كسل أو عدم رغبة فى المشاركه لكنه لجأ للفيس كليتا وده لأنه مش بيكتب للكتابه إنما علشان يشوف لايكات كتير وكومنتات أسرع بس للأسف مش بيكون له أرشيف فى الفيس . 

بصرف النظر عن ده كله انا فكرت فى فكره كنت ناوى أنفذها الأول وبعدين أعرضها لكن لقيت إنه لازم قبل مبنى مبنى أعمله اساس وأساسه هو حضراتكم أتمنى كل إنسان يشوف البوست ده حتى لو مش مدون يحاول يشارك معايا فى الفكره دى .

الفكرة

عباره عن مدونة جديدة كل انسان يحب يشارك فيها هيدخلها وأتمنى يبقى المشاركين فيها كتيييييييير وبالذات مدمنين القراءة 

المدونة هدفها إن كل إنسان قرأ كتاب وفهمه كويس هيعرض لأفكار الكتاب ده ممكن مره واحده أو على شكل أجزاء يعنى الكتاب هيتعرض له فى بوستات متعدده 

فى البداية أنت هتعرض للكتاب من وجهة نظر الكاتب يعنى بعيد عن رايك الشخصى خالص هتتكلم فى الافكار الرئيسية فى الكتاب بحيث الى يقرا كلامك يفهم مضمون الكتاب وبعدين هيبقى فيه فاصل وتعرض لرأيك فى الكتاب فى نقطتين إيه عجبك فيه وايه وجه إنتقادك له وبعدين بقى هتناقش التعليقات الى على الكتاب .

الهدف من الفكره هتكون وسيلة تثقف سريعه كلنا هنستفاد منها وكمان لو حد مش فى مقدرته يشترى كتب هيكون متاح قدامه مكتبه مختصرة ولو ممكن يضع صورة لغلاف الكتاب.

أتمنى كل مدون يقولى رايه فى الفكره وهل ممكن يشارك معانا أو لا