21‏/2‏/2014

صاحبة الأساور الذهبية

انا عايز أتكلم عن حاجه مشهورة جدا فى أوساط الرجال والنساء ومش موجوده الا بين المتزوجين فقط
وعلشان محدش يقول إنى منحاز للرجال هبتدى بيهم

الرجال (الأزواج)
الرجل يجى يقعد مع اولاده وزوجته والحوار يدخل فى أيام الجواز يبتدى يحكى عن تضحياته وإنه إتجوز مراته ومكنش موافق وإنه دفع ليها مهر كبير مع غنها متستحقش وإن اتعرض عليه ستات الدنيا والأخره وهو رفض وإنه عايش مع الست دى علشان ولاده وإنه لو يعرف إن الجواز كده مكنش اتجوز .

النساء (الزوجات)
تلاقى الواحد بالذات قدام ولادها .دا انا كان جايلى عرسان الدنيا والأخره وزراء وأنا رفضت ومفقتش غير على ابوكم ودا من حظى الأسود وشوية بقى وهى مع جارتها دا راجل فقر القرش يدخل من الباب ينط من وشه من الشباك وشوية تتكلم عن وإنها كانت صبية كانت ملكة جمال أثينا وتكمل بقى من اسطوانة الزوج دا انها عايشه معاه علشان الأولاد وإنها رفضت ولا مئة عريس 

الأولاد
طبعا الأولاد داخليا بيتحطموا بالكلام ده لانهم مش بيحسوا بالحب فى الأسره وده بيطلع أبناء معقدين نفسيا حتى الإبن ده لما بيتجوز بيكون له نفس انطباع باباه أو مامتها لو بنت دا غير انه ممكن يخلى سلوك الإبن غير سوى مع الوالدين لأنهم شافهم مش بيحترموا بعض 


كلمة للطرفين
كلمة للزوج والزوجه الى قصدت اسميها صاحبة الأساور الذهبيه لأن كلمة مية عريس دى عامله زى الأسويرة الى بتحاول تزين نفسها بيها إرحمواا ولادكم إرحموا اجيال هتطلع بعدكم إرحموا الشخص الى ممكن يستمع للكلام الفارغ ده وأنتوا مخطوبين كنتوا هتموتوا على بعض ولو قولتوا لا هقولكم كدابين والنصيب مش باختياركم فكل واحد ميعملش نفسه المهم  لا هو كان كازنوفا ولا أنتى فرجينيا 
إرحموا عقول أبنائكم

أنا كتبت الكلام ده لانى شوفت زوجين ولادهم فى نهاية المرحلة الإبتدائية بيتكون ادراكهم وثقافتهم وأبوهم وأمهم بيدوروا مين كان بيجرى ورا التانى طبعا حاجه تخلى الواحد يحزن على حال الأسرة المصرية

هناك 4 تعليقات :

  1. والله يا جمال دي اسمها معيلة وقلة أدب كمان
    لأنهم مهما قالوا يفضل النصيب هو صاحب الكلمة الأخيرة
    للأسف احنا شعوب عندها في الجمجمة غالبا .. طبق كبدة بالسلطات
    :/

    ردحذف
    الردود
    1. فاطمة العبيدى
      تصدقى إنى لما كتبت البوست ده كنت متغاظ منهم جدا
      بس الجمجمه عندهم فاضيه يا ريت لو فيها كبده بالسلطات كانت نفعت بحاجه
      دول عالم هدامه أساسا

      حذف
  2. مفيش راجل بيتجوز بالعافية
    ومفيش وحدة بتجوز غصب
    وبما ان فيه اولاد ما بنهم معنى كدة ان كل واحد منهم قرر يكمل .. لكن ان كل واحد يعيب التانى هى مجرد ازمة اخلاق

    ردحذف
    الردود
    1. صديقى ويل
      البعض لا يرى الزواج من منظوره الصحيح
      هو فقط يريد ارضاء ذاته وبعد ذلك يعطى لنفسه شعور بالتعالى انه يضحى
      لا احد يرغم على شريك حياته ولكن فقط اللبانه الى فى بوق المصريين
      وتبقى صاحبة الأساور الذهبية هى التى لا تكرم الا فى بيت ابيها

      نورت مكانك مره أخرى أخى

      حذف